చివరి క్షణంలో చేజారిన టైటిల్.. గుకేశ్‌ తీవ్ర నిరాశ.. నార్వే చెస్ విజేత కార్ల‌స‌న్‌!

నార్వే చెస్ 2025 టోర్నమెంట్ అత్యంత నాటకీయ పరిణామాల మధ్య ముగిసింది. ప్రపంచ ఛాంపియన్, భారత యువ సంచలనం దొమ్మ‌రాజు గుకేశ్‌ చివరి రౌండ్‌లో ఊహించని రీతిలో ఓటమి పాలుకావడంతో ప్రపంచ నంబర్ వన్ ఆటగాడు మాగ్నస్ కార్ల‌స‌న్ మరోసారి టైటిల్‌ను తన ఖాతాలో వేసుకున్నాడు. 

నిన్న జరిగిన ఉత్కంఠభరితమైన ఆఖ‌రిదైన ప‌దో రౌండ్‌కు ముందు గుకేశ్‌పై కార్ల‌స‌న్ కేవలం అర పాయింట్ ఆధిక్యంలో ఉన్నాడు. దీంతో టైటిల్ ఎవరిని వరిస్తుందోనన్న ఆసక్తి ప్రపంచవ్యాప్తంగా చెస్ అభిమానుల్లో నెలకొంది. టోర్నీ ఆద్యంతం ఇరువురు ఆటగాళ్లు అద్భుతమైన నైపుణ్యాన్ని ప్రదర్శించారు. తొమ్మిదో రౌండ్‌లో వెయ్ యిపై గుకేశ్‌ విజయం సాధించగా.. కరువానాను కార్ల‌స‌న్‌ ఓడించి ఆధిక్యాన్ని కాపాడుకున్నాడు.

అయితే, ఫైనల్ రౌండ్ భారత యువ కెరటం గుకేశ్‌కు తీవ్ర నిరాశను మిగిల్చింది. టైటిల్ ఆశలు సజీవంగా ఉంచుకోవాలంటే కనీసం డ్రా అయినా చేసుకోవాల్సిన మ్యాచ్‌లో అమెరికా గ్రాండ్‌మాస్టర్ ఫాబియానో కరువానాతో తలపడ్డాడు. ఆట చివరి క్షణాల వరకు నువ్వా నేనా అన్నట్లు సాగింది. కానీ, సమయం ఒత్తిడి పెరగడంతో గడియారంలో కేవలం కొన్ని సెకన్లు మాత్రమే మిగిలి ఉన్న తరుణంలో గుకేశ్‌ ఒక తీవ్రమైన తప్పిదం చేశాడు. ప్రత్యర్థి వేసిన నైట్ ఫోర్క్‌కు చిక్కి, తక్షణమే ఓటమిని అంగీకరించాల్సి వచ్చింది.

ఆట ముగిసిన తర్వాత ఓటమి భారంతో గుకేశ్‌ తీవ్ర నిరాశకు లోనయ్యాడు. ఒక్క తప్పిదంతో టోర్నమెంట్ ఆశలు ఆవిరైపోవడాన్ని జీర్ణించుకోలేకపోయాడు. మరోవైపు టోర్నమెంట్‌లో తన ప్రదర్శనపై, ముఖ్యంగా గుకేశ్‌తో జరిగిన గేమ్‌లో ఓటమి గురించి కార్లస‌న్ అంతకుముందు కొంత అసంతృప్తి వ్యక్తం చేశాడు. "ఒక మంచి టోర్నమెంట్ ఆడాలన్న కల (గుకేశ్‌తో జరిగిన) ఆ గేమ్‌తోనే ఆవిరైపోయింది" అని ఫైనల్ రౌండ్‌కు ముందు నార్వే గ్రాండ్‌మాస్టర్ అంగీకరించాడు. అయినప్పటికీ, చివరికి కార్ల‌స‌న్‌ ఛాంపియన్‌షిప్‌ను కైవసం చేసుకున్నాడు.